John Essmat جون عصمت - Digital marketing Consultant | ازاي تنقل شركتك اونلاين

- سواء ده موضوع بالنسبالك مؤقت أو مستمر
الشغل اونلاين اثبت انه لو اتعمل صح مع الناس الصح بتكون نتايجه مبهره من ناحية الانتاج وكمان من ناحية رضا الفريق عن شغلهم وشركتهم.

ازاي توصل لكده؟

ده الموضوع اللي هنتكلم فيه هنا 

-الشغل اونلاين مش مناسب لكل الصناعات، لكن لو قدرت تنقل جزء من شركتك اونلاين او كل شغلك اونلاين هتتفاجئ بالنتايج، وده مش رأي شخصي

- في دراسات كتير وصلت لكده، منها دراسة عملتها جامعة stanford لمدة سنتين على ٥٠٠ موظف ولقت ان الانتاج بيزيد وإهدار الوقت بيقل في حالة الشغل اونلاين.

-وشركات ضخمة على مستوى العالم ، "البيزنس model" بتاعها انهم يعينوا ناس من أي مكان في العالم ويخدموا عملا من أي مكان في العالم.

- واحنا بقالنا اكتر من ٤ سنين بننفذ البيزنس model ده في ال marketing agency بتاعتنا بعد ما كنا بنشتغل من مكتب في ٢٠١٢.

 و هنحاول نلخص اللي اتعلمناه في الفترة دي في المقالة اللى قدامك

- طبعا احنا مش هنتكلم عن البرامج او الادوات، دي حاجة سهل تعرفها، والفريق بتاعنا عمل ملف مخصوص للبرامج اللي تستخدمها للشغل اونلاين، اكتبلنا تعليق على المقالة وهنبعتلك الملف كامل.

- احنا هنتكلم عن الجزء الاصعب و هو

 إزاي هتدير الشغل اونلاين

مش انت نفسك كل الفريق يكون عارف مطلوب منه ايه بالظبط وهيدير وقته ازاي وهيشتغل ازاي،
هيعرفوا ازاي من غير ما يكون كل ده مكتوب بشكل واضح، رغم ان دورك انك تكتب التفاصيل كلها لكن متوقفش الموضوع عندك.
١-مهم ان الفريق بتاعك يكتب معاك قواعد الشغل الاونلاين
كل واحد فيهم خبير في مجاله وعارف كويس تسلسل الtasks وعارف ايه اللي ممكن يعطل الشغل
فلما يكتبوا معاك القواعد:

١- هتستفيد من خبرة كل شخص

٢- هيكونوا ملتزمين بالتنفيذ اكتر، لان هما اللي حطوا قواعد شركتهم

انا فاكر لما حبينا نطور ال policy جمعنا الفريق كله و ال marketing manager كتبت ، وكل واحد من الفريق كان ليه الحق انه يضيف ويطور ويعدل وجمعنا كل التعديلات في ملف واحد بنستعمله لغاية النهاردة.

٢- هنكتب ايه يعني؟
ممكن اديلك أمثلة
مثلا مواعيد الشغل، ومواعيد الاجتماعات، وازاي يرتب اولوياته وازاي مافيش وقت يضيع، ومتوقع منه يعمل ايه وهو شغال اونلاين ولما task يخلص هيعمل ايه وازاي يتأكد انه ماشي صح ، وازاي بيتم تقييم شغله ولو احتاج بريك او اجازة يعمل ايه وايه الفرق بين شغل ال freelance وانه يكون شغال في شركة أونلاين ( لان فيه ناس بتعتبر الاتنين واحد، الشركة الاونلاين مختلفة، ليها مواعيد من ٩ ل ٥ عادي وليها اجازات وأوراق رسمية وكل حاجة زي اي شركة بس بدون مكتب ) وايه الهدف اللي شغالين علشانه… ببساطة كل التفاصيل.

٣- طيب ياترى هينفذوا؟
اه هينفذوا،
اصل لو انت مختار ناس صح، ايه اللي يخليهم مايشتغلوش؟
فيه حاجات فعلا تخلي الناس ماتشتغلش كويس، ، معظمها بسبب افكار سلبية ممكن تجيله عن الشركة او عن زمايله،
يبقى دورك مش بس تكتب قواعد الشغل، لكن دورك تبني ثقة بين أفراد الفريق وبينك وبينهم كمسئول عن الفريق.

- اعمل meeting فيديو في أول كل يوم علشان تشوفوا بعض اونلاين،
- احنا فى الشركة مسمينه stand up meeting رغم اننا بنكون قاعدين
هدف الميتنج انا كل واحد يقول عمل ايه في tasks امبارح و هل tasks النهاردة واضحة بالنسباله ولا لأ.
فى شركات تانية بتخليه اجتماعين، في أول اليوم وفي آخره، علشان يكون فيه تقرير يومي باللي تم.

- مهم ان ال meeting مايكونش tasks بتتوزع بس، لازم يكون فيه الجزء الشخصي او الانساني، مفيش مانع كل واحد يقول عمل ايه في ال weekend يقول حاجة برة الشغل بحيث الناس تعرف بعض ويعرفوا دماغ بعض اكتر وده هيزود ثقة الناس في بعض جوه الفريق.

- مهم انك تفكرهم بالأهداف والرسالة بتاعة الشركة، كان فيه مسلسل زمان لمحمد صبحي اسمه عائلة ونيس ، كان بيجمع أسرته الصبح ويعمل حاجة اسمها حديث الثلاثاء، مفيش مانع تعمل حديث الثلاثاء للفريق :) لكن خليك ملاحظ الوقت وقابلية الفريق انه يسمع.

  • بجانب الاجتماع بتاع الفريق اتأكد انك عملت اجتماع فيديو مع كل فرد مرة في الاسبوع، حتي لو اجتماع سريع.
    ده هيفرق جدا في معرفتك بكل شخص وفي الثقة بينك وبينه.
  • في اجتماع الفريق، بلاش يكون ليك ناس مميزه، او ناس تكلمهم في مواضيع وناس تانية مش عارفة حاجة عن المواضيع دي، ده هيأثر جدا على الشغل.

حتى لو انت شايف ان شغلهم ملوش علاقة بالموضوع، خليهم في الاجتماع يسمعوا ويعيشوا معاك قصة البيزنس.

حط الكلمتين دول قدامك قبل أي قرار:

 الشفافية والمساواة
ده اللي هيخلي الناس تثق فيك وتثق في بعض،
الشفافية يعني مفيش اسرار علي الفريق، كلهم يعرفوا كل المعلومات، لكن طبعا مش المعلومات الفردية زي ظروف كل واحد الشخصية والأتعاب بتاعته و حياته الخاصة، لكن اي حاجة ليها علاقة بالبيزنس كل الناس تعرفها.
و المساواة يعني بتتعامل مع كل الناس بنفس القدر من العدل، المتميز يتكافيء، والتقييم يكون ليه أسس واضحة وواحدة للفريق كله.

هل الكلام ده مهم فعلا؟
مش انت عايزهم يشتغلوا ويعملوا ال tasks بتاعتهم؟
لو مهتمش بالحاجات دي الشغل هيتأثر جدا ولو اهتميت فعلا هتشوف فريق بيحب الشغل و مش بيوفر مجهود علشان يحقق أهدافه.

النقد هو أقوى وسيلة بناء
وال feedback هو اللي بيطور من فريقك جدا، لازم يكونوا بيحبوا اوى ال feedback  بتاعك وبيستنوه، علشان عارفين انه مفيد ليهم، طيب هتعملها ازاي؟

الfeedback  يكون 

One to one
تجنب انك تلوم شخص واحد في اجتماع الفريق، الا لو الفريق كله مشترك في الtask دي مثلا وبتوجه feedback ليهم كلهم

لكن لو هتقول رأيك في شغل فرد ده يكون فيه meeting منفصل ليه لوحده،
انت بالفعل عندك meeting مع كل فرد في الاسبوع، استغل الوقت ده لل feedback واول حاجة تعملها انك تسمع.
- لان ممكن تكتشف ان فيه زاوية تانية في الموضوع مكنتش شايفها

-  بعدها تقول الايجابيات اللي انت شايفها قبل ماتقول اي حاجة عايزة تطور او تتعدل

  • بعدها اسأل اسئله عن نتيجة التاسك اللي مطلعش بالشكل المطلوب، يعني وجه الكلام ناحية النتيجة مش التاسك نفسه أو التقصير اللي حصل.
    مثلا: تفتكر لما نعمل الtask بالشكل الفلاني ومايجبش النتيجة بتاعته ده هيأثر على نجاح الشركة؟
    وهكذا عن طريق اسئلة تخلي اللي قدامك هو اللي يشوف معاك الموضوع من زاويتك.
  • اطلب منه اقتراح للحل، الهدف هنا ان هو اللي قول الحل
  • حطوا خطوات الحل سوا
  • واختم الmeeting بكلام ايجابي ويكون حقيقي مش مجاملة وابعت email بعد الmeeting فيه ملخص اللي اتفقتوا عليه.

الحاجات دي رغم انها مهمة في كل شغل لكن في الشغل الاونلاين بتكون سر قوة الفريق.

آخر نقطة...
المدير الشاطر يعمل leaders او قادة
-مش كل الناس بتحب تكون leader
لكن فيه ناس عندها المهارة دي وبتكون مرتاحة في الدور ده
كل واحد في فريقك خبير في حاجة، مفيش مانع مثلا ان واحد فيهم يكون مسئول عن مشروع معين لفترة معينه وكل الفريق يساعده.
وقاعدة عامة في القيادة والإدارة:
-سيب عينيك على المشروع لكن ارفع ايدك،
لو خليته مسئول عن مشروع ماتروحش تعمل حاجة بداله حتى لو سألك، لان الهدف انه يتعلم برضو، وهدفك انت ان كل نجاح المشروع يرجع ليه هو حتى لو كان بيسألك في كل خطوة.

الميزة التانية انك هتفوض، فهيكون عندك فرصة تعمل tasks أهم بالنسبالك.

وممكن تخلي اكتر من شخص يتعاونوا في مشروع، ده هيزود الثقة بينهم جدا وهيكونوا فاهمين شغل بعض وشخصيات بعض اكتر.
لو عملت leaders هتلاقي الفريق بيبص لنفسه على انهم مجموعه من الخبراء والناس الشاطرة في فريق واحد وده احساس مهم جدا.

الموضوع كبير ولسة فيه كلام أكتر
-احنا اتكلمنا عن حاجات تعملها علشان تأسس فريق قوي اونلاين
نحب نسمع كل اسئلتك في الموضوع ده ونفكر معاك

اكتبلنا تعليق على المقالة وهنبعتلك ملف برامج الشغل اونلاين كامل.

Comments (0)

Leave a comment